По реакциите во јавноста за воведувањето на изборен предмет за сеопфатно сексуално образование во средните училишта, Министерството за образование и наука одлучи да ја повлече наставната програма и да направи нејзина детална ревизија.
Министерката за образование и наука Весна Јаневска денеска изјави дека предметот во овој момент е повлечен, а Бирото за развој на образованието ќе биде вклучено во темелната проверка на содржината на програмата.
„Ние ги повлековме во овој момент програмата и предметот и ќе направиме длабока ревизија по барање на јавноста, да видиме дали навистина во програмата има нешто за што би можело да има забелешки“, рече Јаневска.
Таа посочи дека програмата опфаќа теми поврзани со семејството, заштитата од сексуално преносливи болести, заштитата од несакана бременост, рамноправноста меѓу половите и недискриминацијата.
Јаневска нагласи дека ќе се ангажира и лично во проверката на содржината, заедно со стручните лица од Бирото за развој на образованието.
„Ќе ја поминеме програмата збор по збор, да видиме што е тоа што е проблем во неа“, изјави министерката.
Според Јаневска, постојат научни докази дека сексуалното образование во средните училишта може да биде корисно, особено имајќи предвид дека учениците на оваа возраст се соочуваат со темите опфатени со предметот. Таа нагласи дека станувало збор за изборен предмет кој би можеле да го изучуваат учениците од прва до четврта година, доколку самите се определат за тоа.
„Должност на министерот за образование и наука е да ги слушне сите што имаат какви било коментари за образовниот систем“, додаде Јаневска.
Осврнувајќи се на резултатите од ПИСА 2025, министерката оцени дека тие повторно се многу лоши. Таа рече дека објавените резултати се одраз на реформите спроведувани во претходниот период, имајќи предвид дека актуелната власт дошла на власт во 2024 година, а тестирањето било спроведено само шест месеци подоцна, во 2025 година.
Јаневска смета дека резултатите од актуелната реформа на македонскиот образовен систем ќе може да се оценуваат дури откако учениците опфатени со неа ќе стигнат до возраста на која се спроведува ПИСА, односно за околу девет до десет години.
Таа потсети дека најдобрите резултати по читање и разбирање биле постигнати во 2018 година, што, според анализите и мислењата на наставниците, било поврзано со реформата „Кембриџ“. Воедно, таа посочи дека проблемите во образованието не се поврзани само со наставните програми, туку влијаат и други фактори.
Како можни причини за слабите резултати таа ги наведе општествените и глобалните околности, но и влијанието на социјалните мрежи и неконтролираната употреба на мобилните телефони и таблетите. Според неа, учениците треба повторно да ги развиваат основните вештини за читање и пишување на традиционален начин, додека технологијата треба да се користи за развивање критичко размислување и критичка анализа.
Во однос на употребата на мобилните телефони во училиштата, Јаневска рече дека во голем број училишта тие не се користат во текот на наставата и оти учениците ги оставаат на определени места, како кутии или други направи предвидени за тоа.
Телефоните, според неа, се користат само во исклучителни случаи и во училиштата каде што сè уште нема доволно информатичка опрема за потребите на наставата.
