Јапонија постави три услови за испраќање војска во Ормускиот Теснец

Јапонија постави три клучни услови за евентуално учество во меѓународна мисија во Ормускиот Теснец, објави агенцијата Кјодо, повикувајќи се на извори запознаени со разговорите.

— реклама —

Според информациите, Токио би размислил за испраќање на своите сили за самоодбрана само доколку САД и Иран постигнат договор за прекин на огнот, бидат воспоставени комуникациски канали со иранската страна и се намали нивото на закана во Ормускиот Теснец.

— реклама —

Доколку овие услови бидат исполнети, јапонските сили би можеле да учествуваат во отстранување напуштени мини и обезбедување на трговските бродови кои пловат низ овој стратешки важен морски премин.

Јапонската премиерка Санае Такаичи и иранскиот претседател Масуд Пезешкијан од почетокот на конфликтот телефонски разговарале неколкупати во обид да придонесат за намалување на тензиите.

— реклама —

Ситуацијата на Блискиот Исток останува чувствителна откако САД и Израел кон крајот на февруари започнаа заедничка офанзива против Иран. Конфликтот предизвика нарушувања на клучните поморски и енергетски рути, што доведе до раст на цените на нафтата и гасот на светските пазари.

— реклама —

За Јапонија стабилноста во регионот има особено значење, бидејќи околу 90 проценти од енергетските потреби ги обезбедува преку увоз од земјите во Персискиот Залив. Поради нарушувањата предизвикани од конфликтот, Токио веќе почна да користи дел од своите стратешки резерви на нафта.