Никола Јокиќ, центарот на Denver Nuggets, ќе настапува за кошаркарската репрезентација на Србија во летото 2026 година.
Српските кошаркари и ова лето ќе играат квалификациски натпревари за Мундобаскетот во рамките на ФИБА-прозорците. „Орлите“ на 2 јули ќе се соочат со Швајцарија, а на 5 јули, во Белград, ќе ја пречекаат репрезентацијата на Босна и Херцеговина.
Селекторот Душан Алимпијевиќ потврдил дека Јокиќ ќе го носи дресот на Србија на двата натпревари.
„Никола Јокиќ би требало да биде тука и во јулскиот и во августовскиот прозорец“, изјавил Алимпијевиќ.
Тој додал дека комуникацијата со Јокиќ е одлична уште од првиот ден откако ја презел селекторската функција.
„Ништо не беше спорно од првиот момент. Тоа е човек со кого сум во контакт откако седнав на селекторската позиција. Комуникацијата со него е на наједноставно и најлесно можно ниво. Тој навистина живее за репрезентацијата, иако можеби на некого во одредени моменти не му изгледало така. Тој е човек кој беше многу возбуден за репрезентацијата. Им се јавуваше на соиграчите и им се заблагодаруваше за борбата во претходните прозорци“, рекол српскиот селектор.
Алимпијевиќ нагласил дека очекуваат Јокиќ да биде дел од тимот доколку сè се одвива според планот и без здравствени проблеми до 22 јуни.
Во врска со Богдан Богдановиќ, капитенот на Србија и кошаркар на Los Angeles Clippers, селекторот изјавил дека ситуацијата е поинаква.
„Богдан има своја ситуација што ја решава со клубот и одредени помали здравствени проблеми. Извесно е дека ќе го прескокне јулскиот прозорец, но ќе биде со тимот во август“, додал Алимпијевиќ.
Србија на EuroBasket 2025 разочара со слабите настапи во Рига и беше елиминирана уште во осминафиналето од селекцијата на Финска.
