Иако во моментов тоа изгледа како тешко остварливo сценарио, идејата Лука Дончиќ и Никола Јокиќ еден ден да заиграат заедно во дресот на Лос Анџелес Лејкерс повторно се појавува во американските медиуми.
Лејкерс веќе го имаат Дончиќ како свој прв лидер, а според наводите од НБА-инсајдерот Ентони Ирвин, клубот би можел внимателно да ја следи ситуацијата околу иднината на Јокиќ, особено по промените во сопственичката структура на тимот.
Јокиќ со години е една од најголемите ѕвезди на НБА и речиси секој тим би сакал да го има во своите редови. Неговиот потенцијален тандем со Дончиќ би бил особено интересен и поради нивниот добар однос надвор од теренот, како и долгогодишното дружење.
Сепак, за Лејкерс најголемата пречка е актуелниот однос на Јокиќ кон Денвер Нагетс. Српскиот центар во Колорадо ја изгради целата своја НБА кариера, а покрај договорот и финансиската стабилност, важни му се и комфорот и животот во Денвер.
Јокиќ следното лето би можел да потпише нов договор вреден околу 359,5 милиони долари, што би бил еден од најголемите договори во историјата на НБА. Сепак, неговата иднина би можеле да ја определат и резултатите на Нагетс.
Денвер освои шампионска титула во 2023 година, но оттогаш има освоено само две плејоф-серии. Дополнителен проблем се и финансиските ограничувања со кои се соочува тимот поради правилата на НБА за данокот на луксуз и таканаречениот втор „апрон“.
Јокиќ следното лето би можел да ја одбие играчката опција за сезоната 2027/28 и да стане слободен агент. Друга можност е да потпише нов договор со Денвер, а потоа да побара размена во друг тим.
Во таков случај, Лејкерс би морале да подготват исклучително сериозна понуда доколку сакаат да го доведат српскиот центар во Лос Анџелес.
Во моментов, сепак, најреална е опцијата Јокиќ да остане во Денвер. Но, НБА во последните години покажа дека големите пресврти се можни, а токму преминот на Дончиќ во Лејкерс беше едно од најголемите изненадувања.
Доколку околностите се променат, Лејкерс би можеле да се обидат да го остварат сонот за тандем Дончиќ–Јокиќ. На хартија, таквиот двоец би изгледал застрашувачки.
