Јотова: Бугарија е подготвена за разговори, но без ултиматуми и отстапки

Бугарија е подготвена за разговори со Македонија, но без ултиматуми и без отстапување од европската политика, порача бугарската претседателка Илијана Јотова, коментирајќи ги последните пораки од Скопје и посетата на претседателката на Европската комисија, Урсула фон дер Лајен.

Јотова рече дека е „умерен оптимист“ и најави дека ќе побара од бугарската министерка за надворешни работи, Петрова Чамова, да ѝ ја достави дипломатската нота од министерот за надворешни работи Тимчо Муцунски со барање за средба во Софија.

„Се надевам дека овој пат таа беше исклучително цврста. За овој разговор да биде сериозен, г-дин Мицкоски мора многу добро да ја прочита европската политика во однос на проширувањето“, изјави Јотова.

— реклама —

Таа порача дека според неа прашањето не може да се третира исклучиво како билатерално.

„Република Северна Македонија треба да заборави дека ова е билатерално прашање, како што тој се обидува да го претстави. Ние секогаш сме биле отворени за разговори со нив, но разговори без ултиматуми и без попуштање пред европската политика“, рече Јотова.

Бугарската претседателка додаде дека Бугарија е членка на Европската Унија и оти очекува земјите што се на европскиот пат да ги прифаќаат вредностите на Унијата.

— реклама —

Јотова истакна и дека очекува прво да се реши случајот со Ива Михајлова.

Премиерот Христијан Мицкоски вчера изјави дека доколку Бугарија ја одбие понудата за средба, тоа повторно би ги потврдило тезите на Владата. Тој оцени дека не би било паметно Софија да ја отфрли понудата, но нагласи дека одлуката е суверено право на бугарската страна.

— реклама —

Мицкоски, иако не е задоволен од пораките на Фон дер Лајен во однос на уставните измени, разговорот со неа го оцени како пријателски и позитивен. Предлогот за билатерална средба во Софија го опиша како конструктивен.

Експертот Александар Кржаловски од МЦМС смета дека разговорите со Бугарија можат да претставуваат можност за придвижување на процесот.

„Мислам дека е добра шанса, затоа што Европската Унија, иако можеби не се гледа тоа многу, ако се слуша и гледа внимателно, мислам дека содржеше чекори во насока на она што нашата влада го бараше“, рече Кржаловски.

— реклама —

Тој додаде дека се надева на координиран процес кој би овозможил деблокирање на евроинтеграциите, без, како што нагласи, повторно да се прифати истото решение како досега.

Фон дер Лајен за време на посетата на Скопје порача дека е договорен првиот чекор за деблокада на македонските евроинтеграции. Таа ја повика Владата да иницира средби со бугарските власти, без да прецизира дали во иднина Европската Унија би се вклучила директно во разговорите со Софија.

Таа истакна и дека по деблокадата на преговорите и добивањето патоказ, ЕУ со добредојде ќе ги пречека македонскиот идентитет, јазик и култура.