Јотова не знаела дека Ива Михаилова пристигнала во Бугарија, подготвена е да се сретне со неа

Бугарската претседателка Илијана Јотова ќе го почека заклучокот на лекарите од болницата „Пирогов“ за здравствената состојба на 23-годишната Ива Михаилова, која ја напушти Македонија и се врати во Бугарија, иако во Македонија ѝ се одземени личните документи и ѝ се суди во Кочани за сообраќајна несреќа со смртни последици.

Јотова, одговарајќи на новинарски прашања по учеството на меѓународна конференција за безбедност во Црното Море во Софија, изјави дека за враќањето на Михаилова во Бугарија дознала утринава и дека нема информации за околностите под кои таа ја напуштила Македонија.

— реклама —

„Разбрав дека таа веќе е во Бугарија откако излегов од телевизиско студио на БТВ. Претпоставувам дека сега ќе биде прегледана во „Пирогов“, бидејќи за време на конференцијата дознав дека претстои таков преглед. Ќе почекаме да видиме каков е заклучокот на бугарските специјалисти. За жал, во овој момент не можам да дадам повеќе информации“, изјави Јотова.

На прашањето дали знае како Михаилова ја напуштила Македонија и каква реакција очекува од властите во Скопје, бугарската претседателка рече дека сè уште има многу околности што треба да се разјаснат.

— реклама —

„Ќе видиме. Сè уште има многу нејасни околности. Мислам дека надлежните органи во Бугарија прво треба да дадат изјава“, посочи Јотова.

Таа изрази подготвеност лично да се сретне со Михаилова што е можно поскоро, доколку нејзината здравствена состојба го дозволи тоа. На прашањето дали нејзиното враќање може да претставува безбедносен ризик, Јотова одговори дека не гледа таква опасност.

„Нема начин безбедноста да биде загрозена. Прашањето сега е да се види каква е нејзината состојба и да се преземат итни мерки на кои инсистираме толку месеци, не само тука во Бугарија, туку и пред сите меѓународни институции“, изјави бугарската претседателка.

— реклама —

Веста дека Ива Михаилова, жителка на Кочани со македонско и бугарско државјанство, утринава ја преминала македонско-бугарската граница во придружба на бугарскиот адвокат Николај Димитров ја објави телевизијата БТВ. Во изјава за медиумот, Михаилова рекла дека одлучила да се врати во Бугарија поради влошената здравствена состојба.

Од Министерството за внатрешни работи, повикувајќи се на информации од заедничкиот контакт-центар, соопштија дека ниту македонската ниту бугарската гранична полиција не евидентирала нејзин излез од Македонија, односно влез во Бугарија.

Михаилова, пак, во изјава за бугарските медиуми рекла дека нема ништо незаконско во преминувањето на границата и дека тоа го направила со своите лични документи.

Од Јавното обвинителство информираа дека двата пасоша на Ива Михаилова, македонскиот и бугарскиот, ѝ биле одземени во октомври минатата година, кога учествувала во сообраќајната несреќа со смртни последици за која ѝ се суди во Кочани. Оттогаш, Обвинителството во повеќе наврати дало негативно мислење за враќање на пасошите поради ризик од бегство.