Односите со Македонија во центарот на бугарската предизборна кампања

Кандидатката за претседател на Бугарија, Илијана Јотова, порача дека нема да отстапи од бугарската позиција кон Македонија, обвинувајќи го поранешниот премиер Кирил Петков дека во 2022 година бил на чекор да ги предаде бугарските интереси. Петков ги отфрли обвинувањата и најави дека ќе поднесе тужба против неа.

— реклама —

На предизборната дебата на Бугарската национална телевизија, Јотова изјави дека нема да отстапи ниту сантиметар од договореното, и покрај обидите од Скопје да се тргнат настрана одредени протоколи. Таа тврдеше дека бугарската позиција во 2022 година била спасена во последен момент со интервенција на тогашниот претседател, а сегашен премиер Румен Радев.

Јотова го посочи Петков како слаба алка во тогашните преговори, тврдејќи дека бил на чекор да ја предаде бугарската позиција при договорувањето на францускиот предлог.

— реклама —

Нејзиниот противкандидат Андреј Ѓуров, поранешен премиер на техничката влада и поранешен претседател на пратеничката група на „Продолжуваме со промената“, оцени дека тогашната влада била изложена на напади и обвинувања за предавство. Тој посочи дека денес сите партии го поддржуваат францускиот предлог, вклучително и оние што тогаш го критикувале.

— реклама —

Петков, пак, најави правни чекори против Јотова, обвинувајќи ја дека шири невистини во предизборната кампања. Тој рече дека веќе се консултирал со правен тим за подготовка на тужбата и нагласи дека неговата влада успеала бугарската позиција за Македонија да стане заедничка позиција на Европската Унија.

Јотова оцени и дека по потпишувањето на Договорот за добрососедство нема подобрување на односите меѓу Бугарија и Македонија. Како главни проблеми ги посочи говорот на омраза и нападите врз лица со бугарско потекло, наведувајќи го случајот со Христијан Пендиков.

Јотова и Ѓуров ќе се соочат во вториот круг од претседателските избори во Бугарија, закажан за недела, 1 ноември.