ЈП „Охридски комуналец“ апелира за селекција на метален отпад поради заштита на животната средина

Металниот отпад не го губи својот квалитет и може да се рециклира бескрајно, поради што неговото правилно селектирање има значајна улога во намалувањето на загадувањето и заштитата на животната средина, информираат од ЈП „Охридски комуналец“.

— реклама —

Од претпријатието посочуваат дека користењето рециклирано железо придонесува за намалување на аерозагадувањето за дури 86 проценти, загадувањето на водата за 76 проценти, како и за намалување на употребата на вода за 40 проценти на глобално ниво. Селекцијата на металниот отпад, како што нагласуваат, значително го намалува и испуштањето на штетни материи во природата.

— реклама —

Воедно, од „Охридски комуналец“ предупредуваат дека неселектираните лименки, конзерви и други метални елементи кои завршуваат на депонијата Буково често претставуваат зголемен ризик од пожари, најчесто предизвикани од човечки фактор при нелегално собирање метален отпад.

— реклама —

Граѓаните на Охрид металниот отпад можат да го одложуваат во жолтите канти каде што е започната селекцијата, како и во жолтите контејнери поставени од „Пакомак“. Како и кај другите рециклирачки материјали, особено е важно металните конзерви и лименки да бидат чисти пред одложување.

— реклама —

Од јавното претпријатие порачуваат дека отпадот е прашање кое ги засега сите и упатуваат апел за одговорно однесување и правилна селекција, со цел почист и побезбеден Охрид.