Каја Калас предупредува на нова ескалација меѓу САД и Иран: „Сите ќе бидат губитници“

Шефицата на европската дипломатија Каја Калас предупреди дека постои сериозен ризик од нова ескалација на судирот меѓу САД и Иран, оценувајќи дека продолжувањето на конфликтот би им донело штета на двете страни. Таа истовремено изрази песимизам за можноста за брзо завршување на војната во Украина.

— реклама —

„Постои сериозен ризик од нова ескалација меѓу САД и Иран, а секоја нова ескалација би донела само губитници“, изјави Калас по состанокот на министрите за одбрана на пет европски земји во Париз, на кој се разговарало за безбедноста на Блискиот Исток, поморските трговски патишта и зајакнувањето на европската одбрана.

Калас посочи дека Европската Унија преку поморската операција „Аспидес“ помага во заштитата на трговските бродови во Црвеното Море. Таа им се заблагодари на Франција, Италија и Грција за придонесот во операцијата и нагласи дека пловидбата низ меѓународните поморски патишта мора да остане непречена.

— реклама —

Таа најави и нова европска мисија за поддршка на либанската војска и безбедносните сили, со цел зајакнување на контролата врз територијата, безбедноста на границите и внатрешната стабилност на Либан.

— реклама —

Осврнувајќи се на војната во Украина, Калас оцени дека изгледите за скорешен мир се мали. Таа посочи дека руските напади не даваат причина за оптимизам и предупреди дека Украина ја очекува уште една тешка воена зима.

„Нашата задача е да ѝ помогнеме да ги издржи нападите и да ја зголемиме цената на војната за Русија“, порача Калас.

Шефицата на европската дипломатија најави и подготовка на дополнителни санкции против Москва, со посебен акцент на таканаречената руска „флота во сенка“. Станува збор за танкери што Русија ги користи за извоз на нафта, често со нетранспарентна сопственичка структура и промени на знамињата, со што се обидува да ги избегне западните санкции.