Калас: Најлогично е Русија да плати за штетата што ѝ ја нанесува на Украина

Високата претставничка на Европската Унија за надворешна и безбедносна политика, Каја Калас, изјави дека Русија треба да ја плати штетата што ѝ ја нанесува на Украина, поради што повторно се разгледува можноста за користење на замрзнатиот руски имот за финансирање на Киев.

Европската Унија претходно ѝ одобри на Украина заем од 90 милијарди евра за оваа и следната година, откако земјите-членки не постигнаа согласност за користење на замрзнатите руски средства, од кои најголемиот дел се наоѓаат во Белгија. Сепак, сè почесто се оценува дека одобрената финансиска помош можеби нема да биде доволна.

— реклама —

„Треба да ѝ помогнеме на Украина да опстане, а тука се поставува прашањето од каде ќе дојдат парите. Најлогично е Русија да ја плати штетата што ја предизвикува и затоа замрзнатите средства повторно се на маса“, изјави Калас по состанокот на министрите за надворешни работи на ЕУ.

— реклама —

Таа додаде дека разговорите ќе продолжат со цел да се најде начин за распределба на ризиците меѓу земјите-членки. Белгија досега најсилно се спротивставуваше на користењето на рускиот имот, стравувајќи дека би можела да сноси финансиски последици доколку Русија добие спор во арбитражна постапка.

На состанокот министрите разговарале и за засилените руски хибридни активности против европските држави. Калас оцени дека на ЕУ ѝ е потребен механизам за консултации и брзо дејствување во вакви ситуации, најавувајќи дека Европската комисија ќе подготви предлог за безбедносен протокол за вонредни околности.

— реклама —

Министрите усвоија и санкции против околу 1.600 физички и правни лица за кои се наведува дека ја поддржуваат руската агресија врз Украина. Според Калас, станува збор за најголемото еднократно проширување на списокот на санкционирани досега.

Таа најави и предлог за изолирање на руските спортисти на меѓународните натпреварувања, нагласувајќи дека спортот и културата не треба да се користат за подобрување на имиџот на Русија додека трае војната.

Калас, исто така, изјави дека процената оти европските санкции ѝ нанеле штета на Русија во вредност од еден билион евра се темели на разузнавачки податоци. Оваа процена се разликува од бројката од 500 милијарди евра што ја наведува Франција.