Поранешниот естонски премиер и поранешен европски комесар Сийм Калас почина на 77-годишна возраст, соопшти неговата ќерка Каја Калас, високата претставничка на Европската Унија за надворешни работи и безбедносна политика.
„Со тага морам да објавам дека мојот драг татко Сийм Калас почина синоќа“, објави Каја Калас на Инстаграм.
Калас беше првиот Естонец кој стана член на Европската комисија, функција што ја презеде во 2004 година. Во мандатот на тогашниот претседател на Комисијата, Жозе Мануел Баросо, беше комесар за економски и монетарни прашања, а од 2010 до 2014 година беше потпретседател на Комисијата и комесар за транспорт.
По професија економист, Калас во 1991 година стана гувернер на Естонската банка и беше еден од главните автори на монетарната реформа во земјата. Во 1994 година ја основаше либерално-демократската Реформска партија, а една година подоцна беше избран во естонскиот парламент и стана министер за надворешни работи.
Калас имаше значајна улога и во приближувањето на Естонија кон Европската Унија. Како министер за надворешни работи ги предводеше напорите на земјата за членство во ЕУ, а во 2002 година стана премиер. Во неговиот мандат Естонија ги заврши преговорите за членство во ЕУ и доби покана за влез во НАТО.
Неговата политичка кариера започнала уште во времето на Советскиот Сојуз. Од 1972 до 1990 година бил член на Комунистичката партија на Советскиот Сојуз, а работел и во Министерството за финансии на Естонската ССР.
По веста за неговата смрт, почит му оддадоа и европски официјални лица. Претседателката на Европскиот парламент, Роберта Мецола, оцени дека Естонија и Европа се подобри благодарение на неговото животно дело, додека од Европската комисија порачаа дека Калас помогнал да се обликува европскиот пат на Естонија и важни европски политики.
Неговата ќерка Каја Калас беше премиерка на Естонија од 2021 до 2024 година, а денес ја извршува функцијата висока претставничка на ЕУ за надворешни работи и безбедносна политика.
