Припадниците на генерацијата Z масовно реагираат на социјалните мрежи откако сфатија дека за многумина од нив актуелното Светско првенство е последното што ќе го следат додека се во дваесеттите години од животот.
Причината е едноставна – Светското првенство се одржува на секои четири години, па следниот Мундијал ќе се игра во 2030 година. Тоа значи дека оние што годинава имаат 27, 28 или 29 години, тогаш веќе ќе бидат во триесеттите.
На социјалните мрежи брзо се проширија реакции од корисници кои признаваат дека ова сознание ги изненадило.
„Ова ми го уништи денот“, „Тогаш ќе имам 32 години“ и „Зошто мораше да ме потсетиш?“ се само дел од коментарите што станаа вирални на TikTok.
Генерацијата Z ги опфаќа лицата родени меѓу 1997 и 2012 година. Додека помладите припадници на оваа генерација ќе имаат можност да проследат уште неколку Светски првенства пред да наполнат 30 години, за највозрасните ова навистина означува крај на една ера.
