Килијан Мбапе првпат јавно се огласи по завршувањето на Светското првенство, на кое Франција го освои четвртото место, испраќајќи емотивна порака до навивачите.
Ѕвездата на Реал Мадрид им се заблагодари на сите што ја поддржуваа француската репрезентација во текот на турнирот и порача дека и покрај разочарувањето, тимот оставил сè на теренот.
„Ви благодарам. Беше месец исполнет со многу емоции, во кој ги поместивме сопствените граници. Не ја освоивме титулата што сите заедно ја посакувавме. Тоа боли и ќе боли уште некое време. Можеби ви должевме подобар крај, но можеме да кажеме дека дадовме сè од себе“, напиша Мбапе.
Иако ја освои наградата за најдобар стрелец на турнирот, францускиот капитен истакна дека признанието им припаѓа на сите негови соиграчи.
„Оваа индивидуална награда му припаѓа на тимот исто колку и на мене. Без нивниот труд, додавања и тимски дух, немаше да ги постигнам сите тие голови“, порача тој.
Мбапе истакна дека настапот како капитен на Франција на неговото трето Светско првенство ќе остане еден од најзначајните моменти во неговата кариера.
Во пораката им се заблагодари и на навивачите, како и на селекторот Дидие Дешан и целиот стручен штаб, нагласувајќи дека нивната поддршка никогаш не изостанала.
„Светското првенство заврши, но приказната продолжува. Ќе има нови натпревари и нови можности повторно да се собереме околу играта што сите ја сакаме. Ви благодарам за сè“, напиша Мбапе.
