Неверојатен медицински случај во Шри Ланка: лекари отстраниле камен од мочниот меур тежок дури 3,1 килограм, а според нивните проценки, станува збор за еден од најголемите, а можеби и најголемиот ваков камен досега хируршки отстранет.
Операцијата била извршена минатата недела во болница во Тринкомали, на источниот дел од земјата, кај 55-годишен маж, кој претходно бил примен по мозочен удар.
При лекувањето, лекарите забележале дека пациентот има сериозни тешкотии со мокрењето, по што утврдиле дека во мочниот меур има голем камен. При операцијата бил отстранет камен долг 18,7 сантиметри и тежок 3,1 килограм – со тежина приближна на бебе родено во термин и големина споредлива со јајце од ној.
„Според достапните записи, ова е најголемиот камен во мочниот меур некогаш документиран и отстранет со операција“, изјавил д-р Прагалатан Балакришнан, кој ја предводел операцијата.
Тој додал дека пациентот е во многу добра здравствена состојба, но останува во болница поради лекување на други здравствени проблеми.
Според лекарите, каменот најверојатно се формирал во мочниот меур во период од пет до десет години.
Камењата во мочниот меур се создаваат кога минералите во урината се кристализираат и формираат тврди наслаги. Најчесто се појавуваат кога мочниот меур не се празни целосно, поради што урината станува поконцентрирана и може да дојде до создавање кристали.
Малите камења понекогаш можат да се исфрлат природно, но поголемите може да го попречат протокот на урина и да бараат медицински третман. Камен со големина над четири сантиметри се смета за џиновски.
Доколку податоците бидат потврдени, случајот од Шри Ланка би можел да претставува нов рекорд. Според Гинисовата книга на рекорди, досега најголемиот документиран камен во мочниот меур бил отстранет во Бразил во 2003 година. Тој тежел 1,9 килограми и бил долг 17,9 сантиметри.
Каменот отстранет во Шри Ланка бил речиси еден сантиметар подолг и тежел 3,1 килограм.
