Професионалните возачи на камиони од Западен Балкан најавуваат блокада на сите гранични премини кон земјите од ЕУ на 14 септември, откако Европската комисија потврди дека правилото за престој од 90 дена во период од 180 дена во Шенген-зоната нема да биде променето.
Претседателот на Здружението на транспортери на Србија „Меѓународен транспорт“, Неѓо Мандиќ, изјави дека превозниците нема да се откажат од протестот, бидејќи, според него, европските институции не презеле конкретни чекори за да им овозможат на професионалните возачи подолг престој.
„Ќе протестираме на 14 септември. Ќе ги блокираме товарните терминали и железничките терминали за полуприколки“, рече Мандиќ.
Тој оцени дека ЕУ е свесна за проблемот, но дека, и покрај тоа, не направила ништо за негово решавање.
„Не можеме повеќе да чекаме“, порача Мандиќ.
Од друга страна, портпаролот на Европската комисија, Маркус Ламерт, потврди дека правилото 90/180 нема да биде променето.
„ЕУ е свесна дека одреден број експерти од трети земји кои не се прекугранични работници треба да имаат пристап до Шенген-зоната повеќе од 90 дена во период од 180 дена, но тоа правило нема да се промени“, изјави Ламерт.
Проблемот за превозниците се засили со воведувањето на електронскиот Систем за влез/излез (EES), со кој автоматски се евидентира престојот на патниците од земји надвор од Шенген-зоната. Системот за земјите од Западен Балкан почна да се применува на 12 октомври 2025 година, а по завршувањето на преодниот период следеше целосна имплементација.
Според информациите, возачите кои ќе го надминат дозволениот престој од 90 дена во рамките на 180 дена може да бидат вратени во земјата на живеење, додека товарните возила остануваат на местото каде што се наоѓале во моментот на проверката.
Превозниците предупредуваат дека ваквите ограничувања создаваат сериозни проблеми за меѓународниот транспорт, бидејќи професионалните возачи, поради природата на работата, често мораат да престојуваат во земјите од ЕУ подолг период.
