Претставниците на транспортните здруженија од Македонија, Србија, Црна Гора и Босна и Херцеговина ќе испратат ново заедничко писмо до Европската комисија, барајќи до 10 август да биде понудено прифатливо решение за ограничувањата за престој на професионалните возачи во Шенген-зоната, пренесува Банкар.ме.
Одлуката била донесена на заеднички состанок на претставниците на транспортните здруженија од четирите земји, а ја соопшти претседателот на Меѓународното транспортно бизнис-здружение, Неѓо Мандиќ.
Според Мандиќ, иако проблемите и натаму постојат, тие во моментов не се толку изразени како во претходниот период.
„Се договоривме засега да не преземаме конкретни активности, туку да испратиме писмо до Европската комисија со рок до 10 август да се најде прифатливо, ако не конечно, тогаш барем привремено решение за нашите возачи и транспортни компании да можат непречено да работат“, изјави Мандиќ.
Тој најави дека, доколку до наведениот рок не биде добиен задоволителен одговор од Брисел, транспортните здруженија повторно ќе се состанат и ќе разгледаат дополнителни мерки за забрзување на решавањето на проблемот.
Мандиќ истакна дека превозниците сакаат да избегнат протести и блокади на границите, бидејќи таквите потези би предизвикале штета и за регионалната и за европската економија.
Според него, актуелното правило според кое граѓаните на трети земји можат да престојуваат во Шенген-зоната најмногу 90 дена во период од 180 дена не е соодветно за професионалните возачи.
Транспортните здруженија сметаат дека за непречено извршување на меѓународниот транспорт возачите имаат потреба од околу 130 работни дена во период од 180 дена и дека времето поминато во транзит и работа не треба да се третира како туристички престој.
Проблемот, според превозниците, дополнително се продлабочил по проширувањето на Шенген-зоната кон Хрватска, Романија и Бугарија, поради што голем дел од работното време на возачите се одвива во рамките на Шенген-зоната.
