Канада се подготвува за големи војни судири: предупредување од врвот на армијата

Светот влегува во нова, поопасна безбедносна фаза, предупредува началничката на Генералштабот на канадските вооружени сили, Џени Каринјан, оценувајќи дека армиите мора да се подготват за „големи, конвенционални судири“.

Во изјава за Sky News, таа нагласува дека глобалната безбедносна архитектура е значително променета, што бара трансформација на воените капацитети.

— реклама —

„Светот се промени. Мораме да се подготвиме за конфликти од големи размери, со поинакви способности и поинаква војска“, изјави Каринјан.

Канада веќе спроведува интензивен процес на зајакнување на армијата – најголем од времето на Студената војна. Плановите вклучуваат проширување на редовниот состав, зголемување на резервистите и формирање таканаречена „стратешка резерва“ од околу 300.000 обучени цивили, кои би биле активирани во случај на голема криза.

— реклама —

Фокусот не е само на класичните закани, туку и на растечката геополитичка конкуренција, особено на Арктикот, каде се судираат интересите на западните сојузници, Русија и Кина. Дополнително, се следат и ракетните капацитети на држави како Северна Кореја, кои потенцијално можат да погодат северноамериканска територија.

— реклама —

Каринјан, која ја презеде функцијата во 2024 година, е првата жена на чело на канадската војска и ветеран со искуство од мисии во Авганистан и Ирак. Таа потенцира дека нејзиниот успех е резултат на долгогодишно укинување на системските бариери за жените во армијата.

„Стереотипите дека жените се слаби или не можат да бидат дел од борбени единици и мајки во исто време – тоа се перцепции, не реалност“, вели таа.

Како единствена жена меѓу воените лидери на НАТО, Каринјан оценува дека тоа ќе се промени, но предупредува дека времето за прилагодување на армиите е ограничено.

Пораката е јасна: периодот на асиметрични конфликти се надополнува со ризик од класични, директни судири меѓу држави – сценарио за кое, според неа, светот мора итно да се подготви.