Касами на средба со оџата и владиката по меѓуетничките инциденти во Тетово: „Мирот, безбедноста, благосостојбата и соживотот се наша заедничка одговорност“

По последните меѓуетнички инциденти во Тетово, градоначалникот Биљал Касами одржал средба со тетовскиот муфтија на ИВЗ, д-р Селвер Џемаили, и митрополитот на Тетовско-гостиварската епархија на МПЦ-ОА, г. Јосиф. На средбата било разговарано за случувањата во градот и потребата од зачувување на мирот и соживотот меѓу заедниците, пренесува „Тетово инфо“.

— реклама —

Од Општина Тетово посочиле дека станува збор за изолирани меѓуетнички инциденти кои, како што наведуваат, некои се обидуваат да ги искористат за сопствени цели.

По средбата била упатена заедничка порака за мир, толеранција и меѓусебно разбирање, со повик да не се дозволи злоупотреба на децата за поттикнување меѓуетнички тензии.

— реклама —

„Тетово е наш заеднички дом. Мирот, безбедноста, благосостојбата и соживотот се наша заедничка одговорност“, се наведува во пораката, во која се нагласува дека градот треба да продолжи да биде пример за заеднички живот на различните етнички заедници.

— реклама —

На средбата била изразена и подготвеност за воспоставување заедничка платформа за соработка меѓу верските институции, училиштата, родителите и граѓанските организации. Преку неа би се организирале средби, разговори, како и културни, образовни и спортски активности за зближување на младите.

Учесниците порачаа дека различностите треба да се прифаќаат како вредност, а меѓусебното почитување и соработката да бидат основа за зачувување на мирот и изградба на здраво општество.

— реклама —

Од Општина Тетово најавуваат дека разговорите со сите засегнати страни ќе продолжат, со цел заеднички да се работи на зачувување на соживотот и стабилноста во градот.