Копретседателот на ВЛЕН, Билал Касами, тврди дека постои комуникација и разговори за можно вклучување на Албанската лига во Владата, иако претседателот на партијата, Зијадин Села, ја отфрла таквата можност.
Касами појаснува дека разговорите не се однесуваат на приклучување на Албанската лига кон ВЛЕН, туку на нејзино евентуално учество во Владата. Тој најави дека по враќањето на премиерот Христијан Мицкоски и вицепремиерот од САД ќе има поконкретни чекори.
„Да, има разговори. Со враќањето на премиерот и вицепремиерот од САД ќе имаме нешто поконкретно“, изјави Касами.
Според него, комуникацијата постои, но конечната одлука би зависела од ставовите и барањата на Албанската лига.
„Не станува збор тие да бидат дел од ВЛЕН, туку имало комуникација за да бидат дел од Владата“, рече Касами.
Зијадин Села, пак, категорично ја отфрли можноста Албанската лига да влезе во Владата. Тој порача дека нема намера да го носи, како што го нарече, „печатот на предавството“ и упати повик до албанските пратеници да се откажат од таквиот пат.
Касами истовремено потврди дека има разговори и за можни преминувања на поединци од Алијансата за Албанците во ВЛЕН. Тој посочи дека во наредниот период треба да се следат постапките на поединците за да се види дали таквите разговори ќе резултираат со конкретни чекори.
Од Алијансата за Албанците, пак, Исен Шабани ги негираше информациите дека разговара за преминување во ВЛЕН. Тој изјави дека немало политички разговори, ниту понуда за функција.
Во однос на можноста за предвремени парламентарни избори, Касами рече дека ВЛЕН е подготвен за таков процес, но оти актуелниот фокус е реализацијата на владините проекти и ветувања. Тој изрази уверување дека и во случај на избори, ВЛЕН ќе победи и ќе продолжи да биде дел од Владата.
