Најмалку 13 лица загинаа на Филипините кога тропската бура Јаги го погоди во понеделникот источниот град Касигуран во провинцијата Аурора, изјави претставникот за катастрофи Елсон Егарг.
Училиштата и владините канцеларии ќе бидат затворени денеска во Манила и околните провинции поради очекуваното лошо време. Центарот на бурата беше во крајбрежните води во близина на северниот град Лаоаг во провинцијата Илокос, објави државната метеоролошка агенција Паг-аса.
Бурата имаше ветрови со брзина од 75 километри на час и се очекуваше да се движи северозападно над Јужното Кинеско Море. Најмалку седум лица загинаа во Антиполо, источно од Манила, од лизгање на земјиштето и давење, соопштија властите. Четворица се пријавени за исчезнати по лизгање на земјиштето и поројните поплави.
„Потрагата и спасувањето е во тек“, изјави по телефон Енрилито Бернардо, службеник за катастрофи во Антиполо.
Смртните случаи беа регистрирани и во централните провинции на земјата. Две лица загинаа во Северен Самар поради лизгање на земјиштето, а едно лице се удави во Негрос Ориентал, соопштија официјални лица. Според Елкамел, три лица се убиени во источниот град Нага.
Два други смртни случаи пријавени во централниот град Себу сè уште не се официјално потврдени како предизвикани од невремето, според официјален претставник за катастрофи кој одби да биде именуван.
На Филипините обично има околу 20 тропски бури и тајфуни годишно.
