Бројот на загинати во пожарот на патничкиот траект „Ем-Ви Џун Астер“ на Филипините се искачи на најмалку 76, откако спасувачките екипи извлекоа уште неколку јагленосани тела од внатрешноста на пловилото. Уште 13 лица се водат како исчезнати, соопшти филипинската крајбрежна стража, пренесе ДПА.
Телата се пренесуваат во пристаништето во Корон, каде што се поставени привремени шатори во кои форензичките екипи работат на обработка и идентификација на жртвите. Во петокот во пристаништето беа донесени 30 тела.
Спасувачите во заштитни одела ги пренесуваат посмртните останки од бродовите на Крајбрежната стража до шаторите, додека семејствата на патниците чекаат вести за своите најблиски.
Траектот превезувал повеќе од 130 луѓе, а пожарот избувнал пред самиот крај на повеќе од 20 часа долгото патување кон Корон. Меѓу патниците бил и сопругот на 37-годишната Анелин Магбануа, кој се враќал по посетата на нивните деца во Манила.
„Се надевам дека тој не е меѓу загинатите што ги изнесуваат од бродот. Се надевам дека е жив и дека само отпловил до некој друг остров“, изјавила таа за „Ројтерс“.
Пожарникарите во петокот за првпат влегле во траектот, повеќе од еден ден откако избувнал пожарот. Дотогаш густиот чад и екстремната топлина го отежнувале пристапот до делови од пловилото.
Крајбрежната стража соопшти дека изгорени човечки останки биле пронајдени во делот со економска класа. Снимките од внатрешноста покажуваат искривени метални рамки од креветите, прекриени со пепел, а на дел од фотографиите се забележуваат и остатоци што наликуваат на скелети.
Еден од преживеаните за GMA News раскажал дека најпрво забележал мала количина чад, која за само неколку секунди прераснала во пожар и брзо се проширила низ траектот.
Неизвесна останува и судбината на капетанот. Портпаролката на Крајбрежната стража, комодор Ноеми Кајабјаб, изјавила дека добила информација оти тој е жив, но неговото име не се наоѓа на списокот на 43 потврдени преживеани.
Пожарот е најновиот во низата тешки поморски несреќи на Филипините, каде што милиони луѓе зависат од траекти и мали пловила за патување меѓу островите.
