Целосно реконструираниот Градски базен во Кавадарци денеска и официјално беше пуштен во употреба, во присуство на претседателот на Владата, Христијан Мицкоски, министерот за спорт Борко Ристовски, градоначалникот Митко Јанчев и бројни гости.
Станува збор за еден од најсовремените спортско-рекреативни комплекси во државата, чија реконструкција е реализирана со инвестиција од околу еден милион евра, обезбедени преку вториот јавен повик на Владата.
Со реконструкцијата целосно се обновени големиот и малиот базен, изграден е нов систем за филтрација и пречистување на водата, поставени се водни атракции и тобогани, детски водни реквизити и современо детско игралиште. Обновени се и соблекувалните, тушевите, санитарните јазли, лекарската просторија, пристапните патеки, како и останатите придружни содржини во комплексот.
Од Општина Кавадарци истакнуваат дека проектот претставува значајна инвестиција во спортот, рекреацијата, туризмот и подобрувањето на квалитетот на живот на граѓаните.
Градскиот базен од денес повторно е отворен за посетители и ќе биде достапен за спортски активности, рекреација и одмор за граѓаните од сите возрасти.
