Дигитален номад и неговата сопруга се казнети во Сплит поради нарушување на јавниот ред и мир, по пријави дека правеле бучава, а жената наводно се шетала во топлес на балконот од куќата каде што престојувале.
Според хрватските медиуми, станува збор за 58-годишен маж и неговата 44-годишна сопруга, кои биле пријавени и поради тоа што без знаење и дозвола од сопственичката поставиле базен на балконот од вилата.
Судот му изрекол казна од 300 евра на мажот, плус 100 евра судски трошоци, додека неговата сопруга била казнета со 700 евра поради бучавата и наводното капење и движење во топлес на балконот.
Сопружниците ги негираат обвинувањата и тврдат дека биле жртви на конфликт со сопственичката на сместувањето. Според нив, им биле исклучени струјата и водата, а по враќањето од плажа ги затекнале сменети брави, оштетен базен и исфрлени лични работи, по што биле принудени да преноќат во автомобил.
Од друга страна, сопственичката и нејзината ќерка тврдат дека парот не плаќал кирија и сметки, поставил базен на балконот и правел голема бучава до доцна во ноќта. Тие велат дека соседите повеќепати се жалеле дека жената се движела во топлес на балконот.
И неколку соседи сведочеле пред судот дека жената редовно ја гледале без горниот дел од костимот за капење и дека семејството со денови го нарушувало мирот во населбата. Туристката ги отфрлила тие тврдења, истакнувајќи дека се капела во бикини, а не во топлес.
