Украинските одбранбени сили соопштија дека операцијата со кодно име „Ашан“ значително ја нарушила механизираната офанзива на руските сили, а според нивните проценки, нејзиниот интензитет е намален за период до шест месеци.
Како што објави „Kyiv Post“, операцијата била спроведена со координирани напади со беспилотни летала и планирање засновано на разузнавачки информации, со цел уништување на руски цели длабоко зад линијата на фронтот.
Украинскиот министер за одбрана Михајло Федоров изјави дека операцијата претставува пример за тоа како технологијата, разузнавачките податоци и прецизното планирање можат систематски да го ослабнат офанзивниот потенцијал на противникот.
„За само три дена одбранбените сили погодија 949 непријателски цели“, рече Федоров, додавајќи дека поради тоа руските сили биле принудени да повлечат значителен дел од воената техника од бојното поле и со месеци да се опоравуваат од загубите.
Според украинските власти, првата фаза од операцијата започнала во 2025 година, кога со ноќни напади со дронови биле уништени повеќе од 800 руски оклопни возила и артилериски системи.
Втората фаза, реализирана во јуни годинава, била насочена кон руската артилерија. Во неа биле погодени уште 231 цел, од кои 171 биле уништени, со што вкупниот број погодени цели во рамки на операцијата достигнал 1.180.
Федоров нагласи дека целта на ваквите операции не е само уништување на воена техника, туку и нарушување на плановите за идните руски офанзиви и намалување на ризикот за украинските војници.
Тој додаде дека Украина продолжува да ја проширува употребата на беспилотни системи и автономни технологии на бојното поле, со цел да ја зголеми ефикасноста на одбраната и да ги намали човечките загуби.
