Ќе им се суди на децата-насилници од Ѓорче: четири малолетнички ќе одговараат за бруталното малтретирање на девојчето кое го терале ја јаде измет

Јавното обвинителство отвори постапка против четири малолетнички поради основано сомнение за кривично дело „насилство“, откако МВР поднесе пријава, а во јавноста се појавија вознемирувачки информации за брутално малтретирање на 13-годишно девојче во скопско Ѓорче Петров.

Од Основното јавно обвинителство Скопје информираат дека јавен обвинител од Одделението за малолетници поднел барање за поведување подготвителна постапка до судијата за деца во Основниот кривичен суд Скопје.

„Малолетничките, од кои една на возраст од 17 и три на возраст од 14 години, во два одвоени настани, учествувале во дејствија на насилство кон друго 13-годишно девојче и за нив постапката се води согласно Законот за правда за децата“, соопшти обвинителството.

— реклама —

Обвинителот, имајќи ги предвид тежината и начинот на сторување на делото, предложил и мерки на претпазливост за осомничените.

Паралелно, во врска со истиот случај, до обвинителството се доставени шест кривични пријави за „запуштање и малтретирање дете“ против родители, поради сомнение дека ја запоставиле својата должност за грижа и воспитување, што довело до насилството.

Случајот ја вознемири јавноста откако излегоа информации дека група деца во два наврати физички нападнале девојче, притоа снимајќи го насилството. Редакцијата на „Скопје1“ поседува дел од снимките, но не ги објавува за да се избегне дополнителна виктимизација на малолетната жртва.

— реклама —

Според информациите, насилството се случувало на клупа, каде девојчето било опкружено од група врснички кои ја кубеле за коса, ѝ викале и ја туркале, додека други деца од страна се смееле и поттикнувале.

„Уште еден проблем да ни направиш на сите нас“, се слуша на една од снимките, додека едно од девојчињата ја влече жртвата за коса.

На друга снимка, девојчето е турнато на земја, по што следуваат клоци и удари, додека присутните продолжуваат да снимаат и да се смеат. Во трет случај, едно од девојчињата ѝ удира силен бокс во пределот на лицето.

— реклама —

Дополнително, постои и фотографија на која две од насилничките прават „селфи“ со девојчето додека тоа крвари од носот и устата.

Градоначалникот на Александар Стојкоски потврди дека институциите биле информирани за случајот веднаш по неговото случување на 30 март.

„Случајот е веднаш пријавен во полиција, родителите пријавиле и во училиштето, кое постапило согласно насоките од Министерството за образование. Вклучен е инспектор за малолетничка деликвенција и информиран е јавен обвинител“, изјави Стојкоски.

Тој додаде дека од наставничкиот совет се изречени најстроги воспитно-дисциплински мерки за учениците инволвирани во насилството, како и санкции за оние кои снимале и поттикнувале.

„Навистина го осудувам како човек и родител овој настан. Активности преземаме постојано“, рече Стојкоски.