„Ќе има одговор“: Трамп најави жесток удар по иранскиот напад

Американскиот претседател Доналд Трамп најави дека САД ќе одговорат на иранскиот ракетен напад врз американските бази во Јордан, оценувајќи дека Вашингтон ќе возврати со силен удар.

„Жестоко ќе ги погодиме. Ќе има одговор“, изјави Трамп во телефонски разговор со новинарот на „Фокс њуз“, Треј Јингст.

— реклама —

Тој посочи дека американските системи за противвоздушна одбрана пресретнале речиси сите ирански ракети, освен една, за која било проценето дека не се движи кон цел што би предизвикала значителна штета.

Трамп истовремено остави малку простор за оптимизам околу можноста за брзо постигнување договор со Техеран.

— реклама —

„Тие многу сакаат да се сретнат. Само не знам дали можеме да сметаме на договор со нив. Санкциите почнуваат многу силно да дејствуваат“, изјави американскиот претседател.

— реклама —

Нападот следуваше откако американските сили извршија напад врз лансери на Иранската револуционерна гарда на островот Ларак. Според американски извори, Иран во неделата истрелал најмалку осум балистички ракети кон американските сили во Јордан, но немало посериозни последици.

Од американската страна било соопштено дека нападот врз иранските сили бил изведен откако било утврдено дека се подготвува лансирање ракети со цел поставување нови морски мини во Ормускиот Теснец.

Централната команда на американската војска акцијата ја опиша како „ограничена, прецизна операција“ против сили што поставуваат мини и претставуваат непосредна закана за поморскиот сообраќај и слободното одвивање на глобалната трговија.

Иранските власти признаа дека санкциите сè повеќе ја погодуваат земјата поради намалувањето на извозот на нафта, но Техеран засега не покажува знаци дека е подготвен да го промени курсот или да постигне договор со Вашингтон.