Ќе ја платат секоја штета: Рама им се закани на демонстрантите во Тирана

Албанскиот премиер Еди Рама најави дека учесниците во насилните протести во Тирана ќе се соочат со кривична и финансиска одговорност, вклучително и за предизвиканата материјална штета. Тој порача дека е подготвен за дијалог со граѓаните, но не и со директните сторители на насилството или со политичките партии што не се оградуваат од нив.

— реклама —

Во изјава објавена на социјалните мрежи, Рама нагласи дека правото на протест е уставно загарантирано, но дека уништувањето јавен имот, фрлањето молотови коктели и другите насилни дејствија ќе имаат сериозни правни последици.

— реклама —

Премиерот предупреди дека финансиска одговорност би можеле да сносат и демонстрантите кои лично не уништиле имот, но останале во групата и одбиле јавно да се оградат од сторителите. Тој ги повика учесниците на протестите јасно да се дистанцираат од маскираните групи што предизвикуваат насилство.

„Протестите се право, додека насилството е кривично дело“, порача Рама, додавајќи дека Владата е подготвена за дијалог во секое време и на секое место, но нема да преговара со сторителите или со политички партии што не го осудуваат насилството.

— реклама —

Изјавите доаѓаат во период на масовни протести во Тирана, на кои опозицијата бара оставка од Владата и ја обвинува полицијата за бруталност и прекумерна употреба на сила.

Според објавените информации, албанската полиција досега уапсила 167 лица во врска со насилството и уништувањето имот за време на немирите.