Клековски во посета на Диспечерската служба на здравството во Словенија

Министерот за здравство Сашо Клековски ја започна тридневната посета на Словенија со посета на Националниот диспечерски центар во Љубљана, каде што се запозна со словенечкиот модел на итна медицинска помош и начинот на кој се организира и координира работата на службите.

— реклама —

Клековски, придружуван од амбасадорот Горан Милевски, на средбата со претставници на словенечкото Министерство за здравство и Националниот диспечерски центар, предводени од директорот Андреј Финк, разговарал за реформата на итната медицинска помош, која во Словенија започнала во 2017/2018 година.

Била презентирана работата на Националниот диспечерски центар, кој преку две единици, во Љубљана и Марибор, ги прима сите итни медицински повици и ја координира работата на тимовите за итна медицинска помош и ургентните центри.

— реклама —

На средбата бил претставен и словенечкиот индекс за тријажа, заснован на норвешки модел. Со него итните случаи се класифицираат во три групи според степенот на итност, а според причината за повикот се распределуваат во 27 групи.

— реклама —

Разгледани биле и организациското раздвојување на лекарите и тимовите за итна медицинска помош, како и стандардизацијата на возилата што се користат при интервенции, од мотоцикли до хеликоптери.

Посебно внимание било посветено на стандардите и оперативните постапки, вклучително и следењето на квалитетот на услугите и постапувањето по поплаки. Презентиран бил и системот за обука на диспечерите, која трае од шест до девет месеци, со задолжителна проверка на знаењата на секои пет години.

Министерот Клековски ја оцени посетата како значаен почеток на тридневната посета на Словенија, посочувајќи дека словенечките искуства се важна основа за размена на знаења и продлабочување на соработката во подготовката и спроведувањето на идните реформи на итната медицинска помош во Македонија.