Бесплатни ПСА-тестирања за мажите, Клековски повика на поголема грижа за здравјето

Со бесплатни ПСА-тестирања и пораки за важноста на превенцијата, во рамките на кампањата „Мовембер“ се подигнува свеста за раното откривање на ракот на простатата. Министерот за здравство Сашо Клековски ја посети ЗД „Железничар“, каде што ја поддржа иницијативата за бесплатни тестирања заедно со директорот Спасе Јанев.

Клековски истакна дека ракот на простатата е едно од најчестите малигни заболувања кај мажите, а во Македонија често се открива во понапредна фаза, кога можностите за лекување се ограничени.

— реклама —

„Грижата за машкото здравје не смее да биде табу. Превенцијата е најдоброто вложување во здравјето“, порача министерот, посочувајќи дека мажите често ги одложуваат прегледите поради страв, срам или убедување дека се здрави.

— реклама —

ПСА-тестирањето е брзо и едноставно, со земање капка крв од прст. Клековски појасни дека покачената вредност не значи автоматски присуство на рак, бидејќи може да биде последица и на бенигно зголемување на простатата, воспаление или инфекција. Резултатот го толкува лекар, кој при сомнеж упатува на дополнителна уролошка проценка.

Разговорот за ПСА-тестирање обично се препорачува да започне околу 50-годишна возраст, а кај мажите со семејна историја на рак на простатата околу 45-тата година.

— реклама —

ЗД „Железничар“ е првата јавна здравствена установа во Македонија што организира бесплатни ПСА-тестирања. Во изминатите две години биле опфатени околу 1.000 граѓани, а лицата со покачени вредности биле упатени на дополнителни испитувања. Во соработка со Црвениот крст, биле тестирани и околу 30 бездомници, а планирано е опфаќање и на други социјално загрозени категории.

— реклама —

На настанот присуствувале и пратеникот Драган Ковачки, претседателот на Лекарската комора проф. д-р Никола Јанкуловски, директорот на Агенцијата за храна и ветеринарство Јовица Андовски и директорот на Универзитетската клиника за физикална медицина и рехабилитација д-р Злате Мехмедовиќ.

Клековски им се заблагодари на „Проект Хоуп“, Ротари клуб и „Gentleman’s Crew Skopje“ за поддршката на иницијативите за унапредување на машкото здравје.