Клековски најави реформи во здравството: Повеќе лекови, обновени болници и реформа на итната помош

Подобрување на пристапот до лекови, реорганизација на итната медицинска помош, модернизација на болниците и воведување дигитални здравствени услуги се меѓу приоритетите на Министерството за здравство. За досегашните активности и идните проекти на прес-конференција информираше министерот Сашо Клековски.

Тој соопшти дека новата есенцијална листа содржи 392 лека, од кои 193 се нововклучени. Терапија со ЦФ-модулатори примаат 126 пациенти со цистична фиброза, за разлика од 2021 година, кога биле лекувани само тројца. Подготвени се и протоколи за дисперзирана терапија за пациентите со мултиплекс склероза, од кои 491 од вкупно 835 живеат надвор од Скопје. Дополнително, деблокирана е донацијата на фактор VIII, а за претстојната сезона на грип се обезбедени 86.000 дози вакцини.

— реклама —

„Зад секоја бројка стои конкретна промена, односно повеќе пациенти со пристап до терапија и подобра достапност на здравствените услуги“, истакна Клековски.

— реклама —

Во делот на болничката инфраструктура, обновени се одделенијата за трауматологија во Хируршката клиника „Св. Наум Охридски“ и за неврофизиологија на Универзитетската клиника за неврологија, како и „Машкиот оддел 2“ во Бардовци.

Клиничката болница во Битола добива медицинска опрема вредна над 30 милиони денари, додека во Клиничката болница во Тетово се вработени 109 лица кои претходно работеле со договори. Во болницата „Св. Еразмо“ во Охрид се очекува да завршат активностите за изградба на ново крило и четири операциони сали, а продолжува и обновата на психијатриските установи во Демир Хисар.

— реклама —

Една од најавените промени е реорганизацијата на итната медицинска помош. Планот предвидува издвојување на службата од Здравствениот дом Скопје, воведување систем со парамедици и промени во организацијата на Ургентниот центар во Клиничкиот центар.

— реклама —

Клековски посочи дека дополнителни активности се потребни во радиодијагностиката, онкологијата и Клиничкиот центар „Мајка Тереза“, како и во подготовката на концепт за долгорочна нега.

Министерот најави и спроведување на Стратегијата за дигитално здравство до 2030 година, со која треба да се унапреди дигитализацијата на здравствените услуги. Тој нагласи дека фокусот останува на пациентите и на создавање современ, одржлив и достапен здравствен систем.