Клековски: Извршени 16 операции на повредените во Кочани со помош на израелски хирурзи

Грижата за повредените во трагедијата во Кочани продолжува и по завршувањето на болничкото лекување, а во рамките на соработката со израелскиот медицински центар „Шеба“ досега се извршени 16 операции, информираше министерот за здравство Сашо Клековски.

— реклама —

На денешната прес-конференција, Клековски соопшти дека израелските хирурзи од медицинскиот центар „Шеба“ од Тел Авив, заедно со македонските медицински тимови, извршиле и 24 специјалистички прегледи на повредените.

— реклама —

Интервенциите биле насочени главно кон шаките и рацете, со цел враќање на нивната функција, а опфатиле отстранување и корекција на лузни, ослободување на контрактури, Z-пластика и кожни трансплантати со полна дебелина.

— реклама —

На прес-конференцијата учествуваа и д-р Моти Харац, директор на Националниот центар за изгореници при „Шеба“, д-р Јасмина Ѓоргиевска Павловска, директорка на Универзитетската клиника за пластична и реконструктивна хирургија, д-р Катерина Мирчовска, директорка на Општата болница во Кочани, како и д-р Гордана Георгиева од работната група на Министерството за здравство.

— реклама —

„Здравствените власти се тука на долги патеки. Грижата за повредените во Кочани не заврши со болничкото лекување. Таа продолжува со операции, контроли и рехабилитација“, изјави Клековски, заблагодарувајќи им се на израелските лекари за нивната поддршка.