Министерот Клековски на Денот на здравјето на COP31: Здравјето мора да биде во центарот на климатската акција

Здравјето мора да биде во центарот на климатските политики, а државите треба да инвестираат во здравствени системи отпорни на климатските промени, порача министерот за здравство Сашо Клековски на конференцијата на Обединетите нации за климатски промени COP31, која се одржува во Анталија, Турција.

— реклама —

Клековски денеска учествуваше на Денот на здравјето, каде се обрати на два настани на високо ниво. На Министерската тркалезна маса, на која учествуваа и претставници на Светската здравствена организација и министри за здравство од повеќе држави, тој ги истакна трите приоритети: вклучување на здравјето во климатските политики, инвестиции во здравствени системи отпорни на климатските промени и полесен пристап до финансирање и меѓународна соработка.

— реклама —

„Климатските промени повеќе не се само еколошки предизвик, туку растечка закана за јавното здравје. Оваа година во Македонија тоа го почувствувавме директно: западнонилската треска предизвика повеќе случаи отколку во претходните петнаесет години заедно. Стратегиите сами по себе не ги штитат луѓето. Ги штити нивното спроведување“, истакна Клековски.

На панелот „Хуманитарна помош и здравје: интеграција во управувањето со кризи“, министерот ги претстави искуствата на Македонија во зајакнувањето на подготвеноста на здравствениот систем. Тој ги посочи Националниот акциски план за здравствена безбедност 2024–2030 и Акцискиот план за заштита од топлотни бранови 2025–2030.

— реклама —

Клековски нагласи дека меѓународната помош во услови на кризи мора да биде навремена, усогласена со реалните потреби и координирана со националните институции, за да ги надополнува домашните капацитети, а не да ги заменува.

— реклама —

Тој ја поздрави и Анталиската иницијатива за здравствена отпорност. Подоцна во текот на денот треба да учествува и на панел на Светската здравствена организација, посветен на здравственото лидерство на помалите држави во услови на климатски промени, каде ќе го претстави искуството на Македонија со мерките за заштита од топлотни бранови.