Кочани и утре ќе чекори за правда: Маршот на ангелите продолжува, повик испратен од родителите

Родителите ги повикаа граѓаните да им се придружат на 29 ноември во Кочани, на 29. издание на „Маршот на ангелите“ во 14:05 часот од Паркот на револуцијата. Настанот е најавен како мирен собир „со љубов, со болка и со достоинство“ во чест на загинатите во трагедијата во „Пулс“, со порака дека зад секоја судска постапка стојат човечки животи и семејства кои сè уште чекаат вистинска правда. Тие нагласуваат дека Маршот не е протест, туку глас против неправдата и потсетник дека општеството мора да покаже совест.

— реклама —

Во меѓувреме, во Кривичниот суд во Идризово повторно беше одложено рочиштето за случајот „Пулс“. Дел од адвокатите на одбраната известија дека не го добиле интегрираното обвинение и не можат да се изјаснат за вината, ниту да ги изнесат воведните зборови. Неколку бранители предупредија дека обвинителниот акт содржи измени кои, според нив, директно влијаат врз правата на одбраната.

— реклама —

Оштетените лица едногласно се приклучија на кривичниот прогон и повторно побараа проширена истрага, со потенцијална одговорност и за институциите.

— реклама —

На рочиштето беа презентирани и нови информации за здравствените последици кај преживеаните. Иако првично не покажуваа видливи повреди, последните месеци неколкумина развиле потешкотии со дишење, хроничен замор и други сериозни симптоми кои лекарите ги поврзуваат со долготрајното изложување на чад и токсични материи за време на пожарот.

— реклама —

Трагедијата во „Пулс“, која однесе 63 животи и остави над 200 повредени, продолжува да ја оптоварува заедницата. Семејствата бараат јасна одговорност, долгорочна поддршка и реформи во безбедносните стандарди. Маршот на 29 ноември е нивниот начин да потсетат дека борбата за правда не престанува и дека довербата во институциите мора да се заслужи.