Републичкиот јавен обвинител Љупчо Коцевски им порача на пратениците дека предлог-буџетот за 2026 година повторно го става обвинителството во ситуација да работи без елементарни услови, иако трошоците за сложени истраги драматично растат.
Говорејќи од собраниската говорница, Коцевски потсети дека токму оваа година се отворени низа предмети поврзани со еколошки криминал кои бараат специјализирани анализи, а најскапиот пример е постапката за увезениот мазут за ТЕЦ „Неготино“. За тој случај, обвинителството се сомнева во квалитетот на горивото, а секое поединечно вештачење — кое мора да се изврши во странство — чини 1.500 евра. За целата постапка, потребно е да се испитаат стотици примероци.
Според Коцевски, проблемот не е само финансиски. Обвинителството веќе работи на граница на можностите: бројот на вработени во службата е едвај една третина од потребниот, а во следните три и пол години нема да биде примен нов јавен обвинител.
Тој нагласи дека Македонија заостанува и зад земјите од соседството, каде обвинителствата функционираат со дигитализирани системи и целосно опремени канцеларии. И покрај барањата, во буџетот за 2026 повторно не се обезбедени средства за модернизација на системот за управување со предмети, иако тој требаше да биде поддржан преку ИПА-фондовите. Планираната државна сума за опрема за сите обвинителства во земјата изнесува помалку од 30 илјади евра.
Коцевски потсети и на резултатите. Истрагата за пожарот во дискотеката „Пулс“ во Кочани била завршена за кратко време, а обвинителството обезбедило целосна документација. Во судска фаза веќе се и други комплексни предмети, меѓу кои „Онкологија“, случајот „Адитив“ и неколку групи обвинети за трговија со дрога и тешки кривични дела.
Според државниот обвинител, сите овие процеси покажуваат дека вложувањето во обвинителството не е трошок, туку предуслов за ефикасна правда.
