Кочанскиот суд чека на МВР да ги извести дека Ива Михајлова си отишла во Бугарија и покрај забраните

Основниот суд Кочани сè уште не добил официјално известување од Министерството за внатрешни работи дека Ива Михајлова, и покрај судските забрани, го напуштила Кочани и заминала во Бугарија. За случајот во судот дознале од медиумите и јавно достапните информации, а претседателот на судот и судечки судија во предметот, Спиро Борисов, во телефонски разговор за „Скопје1“ најави дека ќе побараат информации од МВР, по што ќе одлучуваат за натамошното постапување.

„Секогаш постапуваме согласно законите. Во конкретниот случај, сè уште немаме известување од МВР. Штом го добиеме, ќе го известиме и Обвинителството, по што ќе се постапи согласно законските надлежности предвидени со ЗКП“, изјави Борисов за „Скопје1“.

Според неговото објаснување, судот располага со информациите што се објавени во јавноста, но досега не добил официјално известување од ОВР Кочани за заминувањето на обвинетата. Борисов посочи дека судот ќе се обрати до полицијата за да ги добие потребните информации.

— реклама —

Ова следува откако МВР претходно во одговор за „Скопје1“ потврди дека од Основниот суд Кочани не добило наредба за распишување потерница по Ива Михајлова.

„За лицето Михајлова Ива до МВР на РСМ досега нема пристигнато наредба за распишување на потерница од Основен суд Кочани“, соопштија од Министерството.

Обвинителството, пак, потврди дека уште на 9 октомври 2025 година, по предлог на јавен обвинител, на Михајлова ѝ биле одземени двете патни исправи, македонската и бугарската. Дополнително, ѝ биле изречени забрана за преминување на државната граница со лична карта, забрана за напуштање на Кочани и обврска да се јавува кај службено лице.

— реклама —

Од Обвинителството нагласија дека ризикот од бегство бил една од клучните причини поради кои повеќепати давале негативно мислење за враќање на патната исправа.

Истовремено, портпаролот на МВР, Гоце Андреевски, соопшти дека проверките во македонскиот систем за гранична контрола покажале дека за Михајлова нема евидентиран излез од Македонија.

— реклама —

Проверки биле направени и преку Заедничкиот контакт-центар со Бугарија, при што бугарската гранична полиција информирала дека нема евидентиран ниту нејзин легален влез во Бугарија. Според официјалните гранични евиденции, последното регистрирано преминување на Михајлова од Бугарија во Македонија било во октомври 2025 година.

Наспроти овие податоци, Михајлова се појави во Бугарија, а нејзиниот адвокат во изјава за бугарската телевизија НОВА тврдеше дека заедно ја преминале границата преку официјален граничен премин.

„Преку граничен премин поминавме. Ги извадивме документите и поминавме. Луѓето од македонска страна добро знаеја дека е Ива Михајлова. Никој ништо не кажа. Разговаравме и тргнавме“, изјави адвокатот.

— реклама —

Михајлова не кажа кога ќе се врати во Македонија. На прашањето дали планира да се врати, одговори дека тоа ќе го проценат понатаму.

Со последната изјава на Борисов се појаснува дека судот сè уште чека официјални информации од полицијата, иако случајот веќе е јавно познат, а МВР и Обвинителството претходно излегоа со соопштенија за граничните евиденции и активните судски мерки.

Засега нема потврда дали е започната постапка за преиспитување на мерките за обезбедување присуство на Михајлова, ниту кога судот ќе добие официјално известување од полицијата.