Прекумерното изложување на сонце може да предизвика болни изгореници, но и да го зголеми ризикот од рак на кожата, предупредуваат лекарите. Тие нагласуваат дека заштитата од сонцето не е важна само на плажа, туку и при секојдневен престој на отворено, особено за време на високи температури и силно УВ-зрачење.
Една од најчестите грешки е неправилното нанесување на кремата за сончање. Експертите препорачуваат таа да се нанесе најмалку 30 минути пред изложувањето на сонце, а потоа повторно непосредно пред излегување, за да се обезбеди максимална заштита.
Лекарите советуваат кремата редовно да се обновува во текот на денот, особено по капење, бришење со пешкир или обилно потење. Исто така, не се препорачува користење производи со истечен рок, бидејќи нивната ефикасност може значително да биде намалена.
Освен кремата, важна улога има и физичката заштита. Во периодите кога сонцето е најсилно, најдобро е да се престојува во сенка и да се носи лесна облека што ја покрива кожата, шешир и очила за сонце со УВ-заштита.
Посебно внимание треба да се посвети на децата, бидејќи нивната кожа е почувствителна. Бебињата помлади од шест месеци не треба да бидат изложени на директна сончева светлина.
При изборот на крема, експертите препорачуваат производи со заштитен фактор SPF 30 или повисок, кои обезбедуваат заштита од UVB-зраците, но и од UVA-зраците, кои придонесуваат за стареење и оштетување на кожата. Најдобра заштита, велат лекарите, е комбинацијата од правилно користење на кремата, избегнување на најсилното сонце и соодветна облека.
