Најдеталните снимки од површината на Сонцето досега им овозможија на научниците за првпат директно да ги набљудуваат мистериозните ситни вртлози што со децении постоеја само во теоретските модели.
Станува збор за таканаречени Келвин-Хелмхолцови нестабилности, спирални структури што се создаваат на границата меѓу два слоја плазма кои се движат со различна брзина. Слични појави може да се забележат и кај океанските бранови и одредени видови облаци.
Откритието било овозможено благодарение на соларниот телескоп „Даниел К. Иноује“ на Хаваите, кој со своето четириметарско огледало обезбедува најдетални снимки на Сонцето направени досега.
Истражувачите првпат ги забележале вртлозите во април 2025 година, при снимање на магнетно активна област во близина на сончева дамка. Тие биле изненадени не само што успеале да ги регистрираат, туку и од нивниот голем број.
„Бевме навистина изненадени од неверојатната количина ситни детали и динамични процеси што ги открија снимките со висока резолуција“, изјави соларниот физичар Дејвид Куридзе од Националната соларна опсерваторија на САД.
За да ги потврдат резултатите, научниците ги споредиле набљудувањата со детални компјутерски симулации на сончевата плазма, кои покажале исто однесување и ја потврдиле појавата на овие нестабилности долж магнетните граници.
Според истражувачите, откритието би можело да помогне подобро да се разбере како енергијата се пренесува низ атмосферата на Сонцето и зошто неговата надворешна атмосфера е многу потопла од видливата површина.
Научниците сметаат дека ова сознание ќе придонесе и за подобро предвидување на сончевите бури, кои можат да предизвикаат нарушувања во работата на сателитите, ГПС-системите, телекомуникациите и електроенергетските мрежи на Земјата.
