Ултравиолетовиот (УВ) индекс е показател што го мери дневното ниво на сончево зрачење и укажува колкав е ризикот од изгореници на кожата и од долгорочни здравствени последици, меѓу кои и рак на кожата. Затоа, експертите препорачуваат секојдневно да се проверува УВ индексот пред престој на отворено.
Вредностите на УВ индексот се движат од ниски до екстремно високи. Индекс од 1 до 2 означува ниско зрачење, додека вредностите од 3 до 5 бараат умерена претпазливост. При индекс од 6 до 7 се препорачува ограничување на престојот на сонце и користење заштитна облека, а вредностите од 8 до 10 и над 11 значат многу висок и екстремен ризик, при што незаштитената кожа може да изгори за само неколку минути.
На јачината на УВ зрачењето влијаат повеќе фактори, меѓу кои облачноста, надморската височина, географската положба, дебелината на озонската обвивка и делот од денот. Најсилно е во периодот меѓу 10 и 16 часот, а снегот, песокот и водата дополнително ја зголемуваат изложеноста поради одбивањето на сончевите зраци.
Долготрајната изложеност на сонце може да предизвика изгореници, предвремено стареење на кожата, оштетување на очите, алергиски реакции и зголемен ризик од рак на кожата. Според експертите, ултравиолетовото зрачење е одговорно за околу 90 проценти од видливите знаци на стареење на кожата.
За заштита се препорачува користење водоотпорен крем со заштитен фактор (SPF) 30 или повисок, носење шешир и очила со УВ-заштита, престој во сенка и избегнување директно изложување на сонце во најтоплиот дел од денот. УВ индексот може лесно да се провери преку повеќето апликации за временска прогноза и метеоролошки интернет-страници.
