Од СДСМ обвинија дека постојат „двајца Мицкоски“ и дека граѓаните повеќе не можат да му веруваат на премиерот и лидер на ВМРО-ДПМНЕ, Христијан Мицкоски.
„Едниот, додека беше во опозиција, ветуваше дека ќе го врати името, ќе го поништи Преспанскиот договор и ќе обезбеди подобра преговарачка рамка. Другиот, откако дојде на власт, Преспанскиот договор го нарече ремек-дело на дипломатијата, а членството во НАТО најдобра работа за безбедноста и инвестициите“, велат од СДСМ.
Според партијата, сега повторно има две различни пораки од Мицкоски – една за реконструкција на Владата и продолжување на мандатот, а друга за можни предвремени избори.
Од СДСМ тврдат дека Мицкоски во Македонија настапува како противник на Европската Унија, додека во странство се претставува како нејзин поддржувач.
„Овде не спроведува реформи и заедно со Латас води анти-ЕУ кампања, а во странство се фотографира и објавува дека сака европска иднина за државата“, наведуваат од опозициската партија.
Тие го отвораат и прашањето за најавите поврзани со странска работна сила.
„Во странство преговара за мигранти, односно економски работници, а дома им зборува на граѓаните дека нема да ги има. Ние рековме – избори, па мигранти“, стои во соопштението.
Од СДСМ оценуваат дека премиерот испраќа контрадикторни пораки и дека тоа, како што велат, е доказ за слабост и несигурност.
„Мицкоски толку многу лаже што ги лаже граѓаните, ги лаже своите членови, ги лаже коалициските партнери, а на крајот се лаже и себе си. Кој Мицкоски е вистинскиот? Граѓаните веќе знаат – ниту еден“, порачуваат од СДСМ.
