Кој обвинител стои зад понудата за договор со Груби?: ВРЕДИ бара одговори по првото рочиште

По првото рочиште за случајот против Артан Груби повторно се отвораат прашања за можните обиди постапката да заврши со договор со Обвинителството, реагираат од коалицијата ВРЕДИ.

Од ВРЕДИ тврдат дека постоела можност Груби да биде убеден да признае вина во замена за поблага санкција, со што би ставил крај и на политичките амбиции за преземање раководна позиција во ДУИ.

— реклама —

Според нивните информации, Али Ахмети проценил дека судскиот процес би можел да биде ризичен за ДУИ, особено поради можноста Груби преку медиумски настапи да влијае врз рејтингот на партијата.

Од ВРЕДИ наведуваат и дека Груби, наводно, претходно имал договорено медиумски интервјуа, бидејќи очекувал против него да не биде поднесено обвинение, но подоцна бил непријатно изненаден. Продолжувањето на мерката куќен притвор, според нив, претставувало дополнителен притисок тој да постигне договор со Обвинителството пред почетокот на судењето.

— реклама —

Во соопштението се поставува и прашањето кој обвинител, наводно, му понудил договор на Груби и врз основа на што би се постигнал таков договор.

— реклама —

ВРЕДИ го отвора и прашањето за составот на одбраната на обвинетите, посочувајќи дека адвокатите на поголемиот дел од нив биле присутни во правосудниот систем и во периодот на Никола Груевски и Сашо Мијалков.

Од коалицијата дополнително прашуваат зошто не е обезбедено присуството на Перпарим Бајрами, кој го посочуваат како близок соработник на Груби, како и дали евентуалната преквалификација на кривичното дело испраќа политичка порака до Али Ахмети.

Во ВРЕДИ се осврнуваат и на Бујар Османи, тврдејќи дека неговите активности наводно биле препознаени од одредени меѓународни фактори.

Од коалицијата заклучуваат дека судскиот процес допрва ќе отвора нови прашања и дека, како што велат, за раководството на ДУИ „тешките денови допрва започнуваат“.