Колапс на високото образование: УКИМ го нема меѓу 2.000-те најдобри универзитети во светот

Најголемиот и најстар универзитет во земјава – Универзитет „Св. Кирил и Методиј“ (УКИМ) не се најде на најновата листа „Глобал 2000“ на Центарот за рангирање на светски универзитети, што претставува уште еден показател за падот на македонското високо образование на меѓународната сцена.

— реклама —

На штотуку објавеното рангирање нема ниту еден универзитет од Македонија, иако листата е изработена врз основа на анализа на повеќе од 81 милион податоци и опфаќа 2.000 најуспешни високообразовни институции во светот.

Најдобро пласиран универзитет од поранешна Југославија е Универзитет во Белград, кој се наоѓа на 393. место. Следуваат Универзитет во Љубљана на 444. и Универзитет во Загреб на 522. место.

— реклама —

Србија има вкупно четири универзитети на листата, Хрватска три, а Словенија два. Меѓу нив се и универзитетите во Нови Сад, Крагуевац, Ниш, Сплит, Риека и Марибор.

— реклама —

На светско ниво, првото место повторно му припадна на Универзитетот Харвард, пред Технолошкиот институт Масачусетс (МИТ) и Универзитетот Стенфорд. Во првите десет се најдоа и Универзитетот Кембриџ, Универзитетот Оксфорд, Универзитетот Принстон, Универзитетот Пенсилванија, Универзитетот Колумбија, Универзитетот Јеил и Универзитетот Чикаго.

Рангирањето се базира на четири главни критериуми: квалитет на образованието, вработливост на дипломираните студенти, квалитет на наставниот кадар и научноистражувачка работа, при што најголема тежина имаат истражувачките перформанси.

Отсуството на УКИМ и на другите македонски универзитети од листата повторно ги отвора прашањата за квалитетот на високото образование, научната продукција и конкурентноста на домашните високообразовни институции во меѓународни рамки.