Најголемиот државен универзитет ги започна уписите за новата академска година. Кандидатите за студенти на Универзитетот „Св. Кирил и Методиј“ – Скопје денеска и утре ќе можат да се пријават во првиот уписен рок, а на 23-те факултети се предвидени 8.851 место за бруцоши.
Од вкупниот број места, 4.395 се во државна квота, 3.621 се за редовни студенти кои кофинансираат, а 835 места се наменети за вонредни студенти.
Најмногу места има на Медицинскиот факултет – 950, Филолошкиот – 805, ФИНКИ – 800, Економскиот – 655, Филозофскиот – 635, Природно-математичкиот – 626, ФЕИТ и Машинскиот факултет по 600, како и Правниот факултет со 555 места.
За студентите во државната квота надоместот за студирање изнесува 200 евра во денарска противвредност, додека редовните студенти со кофинансирање и вонредните студенти плаќаат 400 евра.
Според министерката за образование и наука Весна Јаневска, годинава бројот на слободни места на сите универзитети е намален за околу 2.000, по направената анализа на потребите на пазарот на трудот. Таа посочи дека квотите се намалени кај одредени струки каде има поголем број невработени, додека кај информатиката, машинството, градежништвото и другите технички струки местата се задржани речиси на исто ниво, поради високата вработливост.
„Намаливме квоти на сите универзитети, соодветно, процентуално, но без оглед на намалувањето на квотите и лани, а јас очекувам и оваа година, да има непополнети места“, изјави Јаневска.
Конечната ранг-листа ќе биде објавена на 27 август, додека запишувањето на примените кандидати е предвидено за 3 и 4 септември. Вториот уписен рок ќе се одржи на 10 и 11 септември, а третиот на 23 септември, на факултетите каде што ќе останат слободни места.
За да се пријават, кандидатите треба најпрво да се регистрираат на upisi.ukim.mk, да ја пополнат електронската пријава преку iKnow-системот и потоа да ја завршат постапката во службата за студентски прашања на избраниот факултет.
Во конкурсот се наведени условите за упис, потребната документација, критериумите за селекција и начинот на пресметување на бодовите од успехот и државната, стручната или уметничката матура.
