Умереното консумирање кафе може да биде поврзано со помал ризик од депресија, анксиозност и стрес, покажува ново истражување објавено во научното списание „Journal of Affective Disorders“.
Според резултатите, луѓето кои пијат две до три шолји кафе дневно имаат помал ризик од нарушувања на расположението и стрес во споредба со оние кои пијат помалку или повеќе кафе.
Истражувањето, сепак, покажало дека зголеменото количество кафе не носи и поголема корист. Пиењето повеќе од три шолји дневно може да биде поврзано со зголемена анксиозност и нарушен сон, со што може да се изгубат позитивните ефекти од умереното консумирање.
Нутриционистката Морган Л. Вокер за „Verywell Health“ го опишува умерениот внес како своевидна „златна средина“, бидејќи над препорачаната количина може да се појават нервоза, послаб сон и зголемена анксиозност, особено кај луѓето кои се почувствителни на кофеин.
Интересно е што резултатите биле слични без оглед на видот на кафето, вклучително и кафето без кофеин. Според Вокер, тоа отвора можност позитивниот ефект да не се должи само на кофеинот, туку и на други состојки во кафето, како антиоксидансите и различните биолошки активни соединенија.
Истражувачите забележале и дека генетските разлики во начинот на кој организмот го разградува кофеинот не влијаеле значително врз резултатите. Забележани се само помали разлики меѓу половите, при што заштитниот ефект бил нешто поизразен кај мажите.
Сепак, авторите предупредуваат дека станува збор за опсервациско истражување, што значи дека резултатите покажуваат поврзаност, но не докажуваат дека кафето директно ги спречува депресијата или анксиозноста.
Експертите посочуваат дека на менталното здравје влијаат и низа други фактори, меѓу кои исхраната, квалитетот на сонот, физичката активност и начинот на справување со стресот.
Наодите, сепак, упатуваат дека кафето може да биде дел од здрава дневна рутина доколку се консумира умерено, но поголемата количина не значи и поголема корист.
