Колумбискиот министер за одбрана Педро Санчез соопшти дека владата понудила награда од 1,4 милиони долари за информации кои би довеле до апсење на бунтовничкиот лидер познат како Марлон.
Малон, чие вистинско име е Иван Јакоб Идробо Аредондо, е осомничен дека наредил бомбашки напад на Панамериканскиот автопат, во кој во саботата загинаа 20 лица, пренесува BBC.
Станува збор за еден од најсмртоносните напади врз цивили во Колумбија и се случува нешто повеќе од еден месец пред претседателските избори закажани за 31 мај.
Санчез го обвини Марлон дека стои зад саботниот напад, како и зад низа други напади во провинциите Каука и Валје дел Каука, на југозападот на Колумбија, во текот на викендот.
Во најсмртоносниот од тие инциденти, 15 жени и 5 мажи загинале кога експлозивна направа била активирана на автопатот што ги поврзува градовите Кали и Попајан, при што биле уништени неколку автобуси и други возила.
Малон припаѓа на вооружена група која ја предводи најбараниот човек во Колумбија, дисидентскиот бунтовнички лидер познат под псевдонимот Иван Мордиско.
Мордиско порано бил дел од Револуционерните вооружени сили на Колумбија (ФАРК), но се одвоил од групата кога започнала преговори за мировен договор со владата во 2016 година. Тој се смета за најмоќниот дисидентски бунтовнички лидер во Колумбија.
Неговата група се занимава со нелегално рударство, изнуда и трговија со дрога. Гувернерот на Каука, Октавио Гузман, го опиша нападот како „најбрутален и најсуров напад врз цивилното население во последните неколку децении“.
