Компанијата за вештачка интелигенција xAI, во сопственост на Илон Маск, поднесе тужба против жител на американската сојузна држава Јужна Каролина, обвинувајќи го дека го злоупотребил системот Grok за создавање незаконска содржина.
Според тужбата, поднесена до федерален суд во Тексас, Тери Харвуд ги прекршил условите за користење на платформата, а претходно оваа година бил уапсен под обвинение за сексуална експлоатација на малолетници.
Од xAI тврдат дека обвинетиот прикачувал фотографии од возрасни лица и малолетници, а потоа се обидувал преку Grok да генерира сексуално експлицитни дипфејк содржини. Компанијата наведува и дека креирал експлицитни слики од возрасни лица без нивна согласност.
Во тужбата се истакнува дека xAI ги суспендира или трајно ги укинува сметките на корисниците кои ги прекршуваат правилата, а сомнителните материјали ги пријавува до Националниот центар за исчезнати и експлоатирани деца во САД.
Компанијата бара судот да му изрече трајна забрана за користење на Grok и да му наложи исплата на парична отштета, чиј износ не е прецизиран.
Ова е еден од првите случаи во кои компанија што развива системи за вештачка интелигенција покренува тужба против свој корисник поради наводна злоупотреба на алатките за генерирање содржини.
