Коридорот 8 и европската интеграција во фокусот на средбата Ферати – Хоџа

Министерот за односи меѓу заедниците на Македонија, Агон Ферати, оствари средба со министерот за Европа и надворешни работи на Албанија, Ферит Хоџа, во просториите на Министерството за надворешни работи во Тирана.

На средбата се разговараше за унапредување на меѓудржавните односи и подобрување на инфраструктурната поврзаност како фактори за економски развој и зближување на граѓаните. Министерот Ферати ги презентираше напорите на Министерството за создавање нова клима меѓу етничките заедници и за борба против стереотипите што негативно влијаат врз нивните меѓусебни односи.

— реклама —

Министерот Хоџа изрази подготвеност за продлабочување на односите во сите области и ја истакна потребата од координирање на напорите за Коридорот 8. Се очекува патниот дел од Коридорот 8 во Албанија да биде завршен во 2029 година, додека железничкиот дел треба да биде завршен во 2032 година. Дополнителните олеснувања на граничните премини беа оценети како значајни за зајакнување на поврзаноста и благосостојбата на граѓаните.

— реклама —

Двајцата министри ја истакнаа важноста на партнерството во рамките на регионалната соработка и европската интеграција, преку конкретни иницијативи што го олеснуваат движењето и создаваат нови можности за заеднички развој и просперитет.

Северна Македонија и Албанија се сојузници во евроатлантското семејство и ја делат заедничката цел за полноправно членство во Европската Унија. Се очекува забрзувањето на овој процес да придонесе за економски развој, зајакнување на демократијата и владеењето на правото, како и за подобрување на социјалната благосостојба.

— реклама —

Посебно внимание беше посветено на социјалната кохезија. Министерот Ферати ја истакна важноста на проширувањето на соработката преку организациите на граѓанското општество во двете земји, покрај меѓуинституционалната соработка.

— реклама —

На крајот, двајцата министри ја потврдија својата подготвеност за подигнување на билатералните односи на ново ниво и за претворање на соработката во конкретни резултати во интерес на граѓаните на двете земји.