Преку соопштение, СДСМ оцени дека пораките од претседателот на Европскиот совет, Антонио Кошта, и најновиот извештај на известувачот за Македонија во Европскиот парламент, Томас Вајц, ги потврдуваат нивните тврдења дека Владата не испорачува реформи и ја манипулира јавноста во однос на европските интеграции.
Од партијата наведуваат дека Кошта јасно порачал оти уставните измени се единствениот услов за формално отворање на пристапните преговори со Европската Унија, оценувајќи дека со тоа биле демантирани најавите за дополнителни гаранции, нова преговарачка рамка или уставни измени со одложено дејство.
СДСМ тврди дека премиерот Христијан Мицкоски ги довел во заблуда граѓаните со ветувања дека ќе обезбеди подобри услови за преговорите со Унијата.
Во реакцијата се посочува и на извештајот на Вајц, во кој, според СДСМ, е констатиран недоволен напредок во областа на владеењето на правото, судските реформи и борбата против корупцијата.
Партијата дополнително наведува дека европратениците предупредиле и на странско влијание и дезинформациски кампањи, што, според нив, претставува потврда на претходните обвинувања за поврзаност меѓу ВМРО-ДПМНЕ и владејачките структури во Србија.
Од СДСМ оценуваат дека актуелната власт ја оддалечува државата од европската интеграција и ја води кон изолација и стагнација. Воедно, тие повторно побараа распишување референдум на кој граѓаните би се изјасниле за европската иднина на државата.
