Крадци за само четири минути однеле златно богатство старо 3.000 години во Шпанија

Во само четири минути крадци успеале да ограбат археолошки музеј во шпанскиот град Вилена и да однесат повеќе од 50 предмети од прочуената колекција „Богатството од Вилена“, која се смета за едно од најзначајните европски богатства од бронзеното време.

— реклама —

Алармот во музејот се активирал околу 5:20 часот наутро, а крадците, според градските власти, ја напуштиле зградата само четири минути подоцна. Се верува дека пристигнале со неколку возила и најверојатно влегле во музејот преку прозорец.

Градските власти наведуваат дека сите безбедносни системи биле активирани и дека засега нема индикации за пропуст од страна на музејот. Се истражува и можноста алармот што непосредно пред кражбата се активирал во градскиот спортски центар да бил намерно предизвикан за да го одвлече вниманието на безбедносните служби.

— реклама —

„Одзедоа поголем дел од богатството“, изјавил видно потресениот градоначалник на Вилена, Фулгенсио Сердан, додавајќи дека украдените предмети се дел од наследството и богатството на градот.

— реклама —

Колекцијата се состои од 29 нараквици, 11 чинии, три шишиња и други предмети, главно изработени од злато, но меѓу нив има и предмети од сребро, железо и килибар. Сите потекнуваат од периодот околу 1000 година пред нашата ера.

„Богатството од Вилена“ било откриено во 1963 година од археологот Хозе Марија Солер. Предметите биле закопани во сад во пресушено речно корито. Иако нивната историска и културна вредност е непроценлива, само вредноста на златото се проценува на околу 1,7 милиони евра.

Кражбата во Вилена е најновата во серијата грабежи што во последниот период ги погодија европските културни институции. Властите продолжуваат со истрагата и потрагата по украдените предмети.