По повеќе од една деценија на пазарот, Fiat официјално се збогува со моделот Tipo. Автомобилот веќе е отстранет од официјалните ценовници и конфигуратори на италијанскиот пазар, со што завршува продажбата на еден од најважните компактни модели на италијанскиот производител.
Претставен во 2015 година како дел од проектот Ægea, Tipo се продаваше на бројни пазари низ светот. Купувачите можеа да изберат лимузинска, хечбек или караван изведба, а од 2020 година во понудата се најде и верзијата Cross. Моделот беше достапен во Италија, Турција, земјите од Блискиот Исток, како и во Мексико, каде што се продаваше под името Dodge Neon.
Tipo беше еден од ретките достапни компактни автомобили на европскиот пазар. Замислен како практичен и рационален автомобил, нудеше сè што им е потребно на повеќето возачи, без непотребен луксуз и технолошки екстраваганции.
Особено се истакна дизел моторот 1.6 Multijet со 131 коњска сила, кој остана во понудата речиси до самиот крај на производството и денес сè уште се користи во возилата на италијанските карабинери. Подоцна гамата беше проширена и со бензински и благи хибридни погонски единици, меѓу кои се издвојуваше 1.5 mild-hybrid со 130 коњски сили.
Во 2020 година Fiat ја освежи целата понуда на Tipo и ја претстави изведбата Cross, инспирирана од SUV моделите, со повисоко подвозје и поизразен робустен изглед.
Производството на Tipo заврши во фабриката на Fiat во турската Бурса.
Сепак, Fiat нема долго да остане без претставник во компактната класа. Веќе се најавени новите модели Grizzly и Grizzly Fastback – два SUV модели развиени на платформата Smart Car, која ја користи и Fiat Grande Panda.
Новите модели ќе бидат пократки од 4,5 метри и ќе се нудат со бензински, хибридни и целосно електрични погони. Нивната официјална премиера се очекува на Саемот за автомобили во Париз во 2026 година, каде Fiat ќе ги претстави своите нови адути за европскиот пазар.
