Крај на линеарните покачувања: Пензиите од септември повторно ќе растат процентуално

По две години на линеарни зголемувања, пензиите од септември повторно ќе се усогласуваат според законската формула, што значи дека секој пензионер ќе добие процентуално зголемување во зависност од висината на пензијата.

Премиерот Христијан Мицкоски денеска потврди дека септемвриското усогласување ќе се спроведе според законскиот механизам, но точниот процент сè уште не е утврден.

— реклама —

„Тоа ќе биде редовно нивелирање, усогласување согласно закон“, изјави Мицкоски, најавувајќи дека точниот износ ќе биде познат наскоро.

Пензиите законски се усогласуваат двапати годишно – во март и септември. При пресметката се земаат предвид движењето на просечно исплатената плата и трошоците за живот. За разлика од досегашните линеарни покачувања, при процентуалното усогласување повисоките пензии ќе имаат и поголемо зголемување изразено во денари.

— реклама —

Септемвриското зголемување ќе се однесува на пензиите за септември, кои ќе бидат исплатени во октомври.

— реклама —

Во изминатите две години пензиите беа зголемени четири пати со фиксни износи – двапати за 2.500 денари и двапати за 1.000 денари. Така, сите пензионери, независно од висината на пензијата, добија вкупно зголемување од 7.000 денари.

Мицкоски рече дека враќањето на законската формула е поврзано и со иницијативите пред Уставниот суд за оценување на уставноста на линеарните зголемувања.

— реклама —

„За да ги заштитиме пензионерите и пензиите, понатаму зголемувањето ќе биде согласно усогласувањата предвидени со закон“, рече премиерот.

Колкав ќе биде процентот на септемвриското усогласување сè уште не е соопштено. Надлежните ги прават пресметките врз основа на податоците за растот на платите и трошоците за живот, по што треба да биде објавен конечниот процент.